കടൽ ഒച്ചുകൾ (Kadal ochukal ) - Sea slugs

തീരക്കടൽ പാറപ്പാരുകളിൽ കാണുന്ന മറ്റൊരിനം ജീവികളാണ് ഒച്ചുകൾ. വർക്കലക്കടുത്ത തീരക്കടൽ പാരുകളിലും കാപ്പിലിനടുത്ത കണ്ടം തിന്നി പാരിലും ഇവയെ ധാരാളം ഡോക്കുമെന്റ് ചെയ്തിട്ടുണ്ട്. ആ പ്രദേശങ്ങളിലെ പാരുകൾ വെട്ടുകൽ പാരുകളായതിനാൽ ആവാം ഈ ജീവികൾ ഇവിടെ അധികമായി ഉള്ളത്. സാധാരണ കരയിലെ ഒച്ചകളെ പോലെ കട്ടിയുള്ള പുറംകവചം ഒന്നുമില്ലാത്തവയാണ് ഈ ജീവികൾ. കാഴ്ചയിൽ നല്ല ഭംഗിയുള്ളവ. പകൽ സമയങ്ങളിൽ ഇവ പാരുകളിൽ മേഞ്ഞു നടക്കുന്നതിന്റെ എത്രയെങ്കിലും വീഡിയോ എഫ് എം എൽ പകർത്തിയിട്ടുണ്ട്. ഒരിക്കൽ പുറം തോടുള്ള ഒരു കടലൊച്ചിനെ വിഴിഞ്ഞത്തു നിന്നും കണ്ടെത്തുകയുണ്ടായി. പാറപ്പാരുകളിൽ നിന്നും കടലൊച്ചുകളുടെ മുട്ടയും എഫ് എം എൽ ഡോക്യുമെന്റ് ചെയ്തിട്ടുണ്ട്. കടലിലൂടെ ഒഴുകി നടക്കുന്ന കടൽ പായലുകളിലും മറ്റും തണൽപറ്റി സഞ്ചരിക്കുന്ന മറ്റൊരിനം ഒച്ചുകളുണ്ട്. അവ അതേ പായലുകളിൽ തന്നെ മുട്ടയിടുന്നതായും കണ്ടെത്താൻ കഴിഞ്ഞു.