കടൽ കാക്കകൾ (Kadal kaakkakal) / Sea birds.
തീരത്തു നിന്നുകൊണ്ട് കടലിലേക്ക് നോക്കിനിൽക്കുന്ന ഏതൊരാൾക്കും കടലിനു മുകളിലൂടെയും കടലിനെ തൊട്ടു തൊടാതെയും പറന്നുപോകുന്നപക്ഷികൾ കൗതുകം ഉണർത്തുന്ന കാഴ്ചയാണ്. ഏറെ വർഷങ്ങൾക്ക് മുമ്പ് ഒരിക്കൽ സ്റ്റീവ് ക്രീച്ച് എന്ന വിദേശ സുഹൃത്ത് വലിയതുറ കടൽ പാലത്തിന് മുകളിൽ വന്ന് കുറേയേറെ സമയം ചെലവിടുന്നത് കണ്ടു. ഒടുവിൽ തിരികെ പോകും മുമ്പ് അയാൾ പറഞ്ഞു, നൂറിലേറെ കടൽ പക്ഷികൾ ഈ ചുരുങ്ങിയ സമയത്തിനുള്ളിൽ അതുവഴി കടന്നു പോയതായി അയാൾ എണ്ണിത്തിട്ടപ്പെടുത്തിയെന്ന്. തുടർച്ചയായി പറന്നു പോകുന്ന കടൽ പക്ഷികൾ എവിടെയാവും വിശ്രമിക്കുക എന്നതിനെപ്പറ്റി ചിന്തിക്കാതിരുന്നില്ല. കൂടുതൽ പക്ഷികൾ തെക്കോട്ട് പറക്കുന്നത് കൊണ്ട് ഒരിക്കൽ വള്ളത്തിൽ ഒരു യാത്ര നടത്തി. ഒടുവിൽ കടൽ പക്ഷികൾ വിശ്രമിക്കുന്ന ചിലയിടങ്ങൾ കണ്ടെത്തിയാണ് തിരികെ വന്നത്. കന്യാകുമാരി ജില്ലയിലെ കുളച്ചലിൽ തീരക്കടലിൽ ഉയർന്നു നിൽക്കുന്ന പടുകൂറ്റൻ പാറയിൽ നൂറുകണക്കിന് പക്ഷികൾ വിശ്രമിക്കുന്നത് കണ്ടു . അത് കഴിഞ്ഞ് ഇനയത്തെ കടലിലെ പാറകൾ ഇവയുടെ മറ്റൊരു താവളം ആണെന്ന് തിരിച്ചറിഞ്ഞു . അതിൽ തൊടികല്ല് എന്ന് വിളിപ്പേരുള്ള പാറയുടെ മുകൾഭാഗം മുഴുവൻ വർഷങ്ങളായി പക്ഷിക്കാഷ്ഠം വീണ് പ്രത്യേക രൂപം തന്നെ ഉണ്ടായിരിക്കുന്നു.
കടൽ പക്ഷികൾ ഇത്തരം പാറകളിൽ മാത്രമല്ല വിശ്രമിക്കുക കടലിലൂടെ ഏതെങ്കിലും ഒരു പാഴ് വസ്തു ഒഴുകിപ്പോവുകയാണെങ്കിൽ അതുവഴി പോകുന്ന പക്ഷികൾ ഉടൻ അതിൽ വന്നിരുന്നു വിഷമിക്കുന്നത് കാണാം . അദാനി പോർട്ട് നിർമ്മാണത്തിന്റെ ഭാഗമായി കടൽ നികത്താൻ ഉപയോഗിച്ച ഫ്ലോട്ടിങ് പൈപ്പുകളിൽ കടൽ പക്ഷികളുടെ സാന്നിധ്യം നിത്യ കാഴ്ചയായിരുന്നു. കടൽ പക്ഷികളിൽ പലയിനങ്ങൾ ഉണ്ടെങ്കിലും കടൽ പണിക്കാർ പൊതുവേ ഇവയെല്ലാം കടൽ കാക്കകൾ എന്നാണ് വിളിക്കുക.