കല്ലു ഞണ്ടുകൾ (kallu njandukal ) / Pebble Crabs
ചെറിയ കല്ല് പോലുള്ള ശരീരവും കാലുകളും ഉള്ള ഈ ഞണ്ടുകളെ പുറം കടലിലും തീരക്കടലിലും കാണാം. വലിയതുറ കടൽപ്പാലത്തിലും വിഴിഞ്ഞത്തും കോവളത്തും ഈ ഇനം ഞണ്ടുകളെ ഡോക്യുമെന്റ് ചെയ്തിട്ടുണ്ട്.
വലിയതുറ പാലത്തിൽ ഞണ്ടുകൾക്കായി വല അഥവാ കച്ചാൽ വിടുമ്പോൾ ഞണ്ടുകൾക്കൊപ്പമാണ് കല്ല് ഞണ്ടുകൾ കിട്ടിയിട്ടുള്ളത്. കോവളത്ത് ഒരിക്കൽ ഒരു പ്രത്യേക ഇനം കല്ല് ഞണ്ടുകൾ കൂട്ടത്തോടെ കരയ്ക്ക് വന്നു. അവ തീരത്ത് കരഞണ്ടുകളെ പോലെ തിരയടിക്കുന്നിടത്തെ മണലിൽ പുതഞ്ഞിരിക്കുന്നത് കണ്ട് തൊഴിലാളികൾ ഉടൻ എഫ് എം എല്ലിനെ വിവരം അറിയിച്ചു. ഞങ്ങൾ അവിടെയെത്തി അവയെ എടുക്കുകയും വ്യത്യാസം തോന്നിയ ചില ഇനങ്ങളെ മാത്രം മാറ്റി കേരള യൂണിവേഴ്സിറ്റി അക്വാട്ടിക് ബയോളജി ആൻഡ് ഫിഷറീസ് ഡിപ്പാർട്മെന്റിനു നൽകുകയും ബാക്കിയുള്ളവ തിരികെ കടലിലേക്ക് തന്നെ വിടുകയും ചെയ്തു. യൂണിവേഴ്സിറ്റിയിൽ നിന്നും ലഭിച്ച വിവരം അനുസരിച്ച് Ryphila cencellus എന്ന ഇനം കല്ല് ഞണ്ടുകളാണ് അവയെല്ലാം എന്ന് തിരിച്ചറിഞ്ഞു. ഈ അനുഭവം നവമ്പർ മാസത്തിലാണ് ഉണ്ടായത്. തുടർന്നുള്ള വർഷങ്ങളിലെ നവംബർ മാസത്തിൽ കോവളത്തെ ആ പ്രത്യേക ഇടം നിരീക്ഷിച്ചെങ്കിലും അതുപോലൊരു കാഴ്ച പിന്നെ ഒരിക്കലും കാണാനായില്ല. വിഴിഞ്ഞം മേഖലയിൽ നിന്നും ശേഖരിച്ച കല്ല് ഞണ്ടുകൾ എല്ലാം 28 - 30 മീറ്റർ ആഴമുള്ള കടലിൽ അടിത്തട്ടിൽ വിട്ട വലകളിൽ ലഭിച്ചതാണ്. കല്ല് ഞണ്ടുകളുടെ എല്ലാ കാലുകളുടെയും അഗ്രം കൂർത്താണ് ഇരിക്കുന്നത്. അതിനാൽ അവയ്ക്ക് നീന്താൻ ആവില്ല എന്ന് കരുതാം.